चंद्रपुर:- चंद्रपूर शहरात वाहतूक व्यवस्था सुधारण्यासाठी वाहतूक विभागाकडून नो पार्किंगमधील गाड्यांवर कारवाई केली जाते. मात्र, ही कारवाई करताना वाहतूक पोलीस अनेक नियमांचे उल्लंघन करत असल्याच्या माहिती समोर येत आहेत.
शहरातील अनेक भागांमध्ये वाहतूक पोलिसांकडून नो पार्किंगमधील गाड्या टोईंग केल्या जातात. पण गाडी उचलण्यापूर्वी गाडीमालकाशी संपर्क साधला जात नाही, स्पीकरवरून गाडीचा नंबर पुकारला जात नाही आणि नो पार्किंगचे चिन्ह नसतानाही गाड्या उचलल्या जातात.
* गाडी मालकाशी संपर्क नाही: नियमांनुसार, गाडी उचलण्याआधी पोलिसांनी गाडीमालकाशी संपर्क साधणे किंवा त्याला घटनास्थळी बोलावणे आवश्यक आहे. पण चंद्रपूरमध्ये असे होताना दिसत नाही, ज्यामुळे नागरिकांना थेट दंड भरावा लागत आहे.
* नो पार्किंगचे चिन्ह नसतानाही कारवाई: अनेक ठिकाणी नो पार्किंगचे चिन्ह नसतानाही वाहतूक पोलीस गाड्या उचलतात. हा नियमभंगाचा प्रकार असून यामुळे नागरिकांमध्ये संभ्रम निर्माण होत आहे.
* मार्किंगची कमतरता: गाडी उचलल्यानंतर त्या जागी गाडीचा क्रमांक किंवा टोईंग व्हॅनचा संपर्क क्रमांक लिहिणे आवश्यक आहे, जेणेकरून गाडीमालकाला आपली गाडी कुठे गेली याची माहिती मिळेल. पण चंद्रपूरमध्ये ही पद्धत वापरली जात नाही.
यामुळे नागरिकांना दंड भरण्यासोबतच नाहक त्रासाला सामोरे जावे लागत आहे. वाहतूक पोलिसांनी नियमांचे पालन करून कारवाई करावी, अशी मागणी नागरिक करत आहेत.
